Հայաստանի առաջին շարժական ագրովոլտային էլեկտրակայանը

Նախագիծն իրականացվել է ԷկոՎիլ Հոլդինգի նախաձեռնությամբ և առաջինն է Հայաստանում, որտեղ մեկ լուծման մեջ համադրված են արևային էներգիայի արտադրությունն ու գյուղատնտեսական գործունեությունը։ Ագրովոլտային համակարգը հնարավորություն է տալիս նույն հողատարածքն օգտագործել միաժամանակ երկու նպատակով՝ արտադրելով մաքուր էներգիա և պահպանելով գյուղատնտեսական նշանակությունը։

Կայանի գլխավոր առանձնահատկություններից մեկն այն է, որ այն կառուցված է բարձր կոնստրուկցիայով, ինչը հնարավորություն է տալիս շարունակել գյուղատնտեսական աշխատանքները արևային վահանակների ներքո։ Բացի այդ, կայանը շարժական է և հետևում է արևի շարժին, որի շնորհիվ ապահովվում է ավելի բարձր արտադրողականություն և արևային էներգիայի առավել արդյունավետ օգտագործում։

Բացման արարողությանը մասնակցել են պետական կառույցների, մասնավոր հատվածի, միջազգային կազմակերպությունների և էներգետիկ ոլորտի ներկայացուցիչներ։ Միջոցառման ընթացքում ներկայացվել են ագրովոլտային տեխնոլոգիաների առավելությունները, ինչպես նաև դրանց կիրառման հեռանկարները Հայաստանում։

Այս նախագիծը կարևոր քայլ է դեպի կայուն գյուղատնտեսության և վերականգնվող էներգետիկայի համատեղ զարգացում՝ նպաստելով հողային ռեսուրսների արդյունավետ օգտագործմանը, էներգետիկ անկախության ամրապնդմանը և նորարարական տեխնոլոգիաների ներդրմանը։

ԷկոՎիլ Հոլդինգը շարունակելու է իրականացնել նորարարական նախագծեր, որոնք նպաստում են Հայաստանի կանաչ էներգետիկայի զարգացմանը և երկրի անցմանը դեպի ավելի կայուն ու արդյունավետ էներգետիկ համակարգ։